Господи, Иисусе Христе, Спасителю, Боже всякаго утешения, Истинный Врачу душ и телес человеческих! Ты во дни земныя жизни Твоея всю страну земнаго отечества Твоего прошел еси, благотворя и исцеляя всех обладаемых диаволом, и во уверение людей в Божестве Своем и во озарение их светом истиннаго Боговедения являл над недужными животворную силу всемогущества Твоего, исцеляя одержимых неисцельными болезнями единым прикосновением, мановением, словом и единым хотением Своим! Ты, ради спасения нашего, восприяв на Себя наши немощи, понес наши болезни и в ранах Своих отверз источник исцелений язвам и недугам душ наших! Ты, по суду правды Твоея, попускаешь человеку недуги и по милосердию Своему врачуешь их; поражаешь и исцеляешь, умерщвляешь и оживотворяешь; посылаешь слово Свое и с ним дар жизни, да принесет человек пред Тобою покаяние во грехах своих и да славит Тебя за милость Твою.
О, Всеблагий, о всех промышляющий Боже! Ты един венчаешь успехом благия намерения человеческия, в Твоих руках исход всякаго добраго дела! Тебе припадаю, помози мне, недостойному рабу Твоему (имя)! Укрепляй меня в трудах врачебных, содействуй в облегчении страданий человеческих, вразумляй на полезное и сохраняй от душевреднаго. Призри, Многомилостиве, на делание и служение мое, даждь ми быти верным вмале; послужити болящим, Тебе ради, носити немощи немощных, и не себе, но Тебе Единому угождати во вся дни живота моего. Ты бо рекл еси, Христе: "Понеже сотвористе единому от сих братий Моих меньших, Мне сотвористе". Ей, Господи, даждь ми, грешному, по сему глаголу Твоему, яко да сподоблюся творити благую Твою волю во отраду и утешение искушаемых, недугующих раб Твоих, ихже искупил еси честною Твоею Кровию. Низпосли ми благодать Твою, попаляющую во мне страстей терние, не отвращай от меня Лица Твоего, не отнимай благодати Твоей; будь Врачом тела и души моей, очисти мя от греховной проказы и удостой со всеми благоугодившими Тебе святыми врачами прославлять Тебя, Спаса Христа, со Безначальным Твоим Отцем, и Пресвятым, Благим и Животворящим Духом, во веки веков. Аминь.