Го́споди, Бо́же и Созда́телю наш, о́бразом Свои́м почты́й нас, челове́ки, и научи́вый избра́нныя Твоя́, я́ко диви́тися вне́млющым уче́нию Твоему́; откры́вый прему́дрость младе́нцем; Иже Соломо́на, и всех взыску́ющих прему́дрости Твое́й, научи́вый! Отве́рзи сердца́, умы́ и уста́ рабо́в Твои́х (имярек), во е́же прия́ти си́лу зако́на Твоего́, и со успе́хом позна́ти преподае́мая им поле́зная уче́ния, в сла́ву Пресвята́го Имене Твоего́, в по́льзу и созида́ние Святе́й Твое́й Це́ркви, и разуме́ти благу́ю и соверше́нную во́лю Твою́. Изба́ви их от вся́каго нало́га вра́жия, соблюди́ их в Правосла́вии и ве́ре, и во вся́ком благоче́стии и чистоте́ во вся дни живота́ их, да преуспе́ют в ра́зуме и во исполне́нии за́поведей Твои́х; да та́ко предугото́вани, просла́вят Пресвято́е Имя Твое́, и бу́дут насле́дницы Ца́рствия Твоего́!

Я́ко Ты еси́ Бог, си́лен в ми́лости, и благ в кре́пости, и Тебе́ подоба́ет вся́кая сла́ва, честь и поклоне́ние, Отцу́, и Сы́ну, и Свято́му Ду́ху, всегда́, ны́не и при́сно, и во ве́ки веко́в, ами́нь.