Боже отец наших, Иже от лет древних роды человеческия Своим Промышлением созидаяй и сохраняяй, и коегождо спасение в меру его строяй! Призри ныне милостивно на молитву мене, недостойнаго раба Твоего (имярек), и, аще есть на сие святая воля Твоя, во благовремение прошение мое благоутробно исполни! Ты бо рекл еси, яко не достоит быти человеку единому на земли, но помощницу по нему от кости и плоти его сотворити подобно есть. Темже убо дерзаю благость Твою молити, да и мне, немощному, послется честнаго брака соуз. Не бо плотския скверныя похоти ради о сем молю, но да помощницу благую в многотруднаго жития сего поприще обрящу, с неюже честно мя пожити сподоби и о чадех благодати дарование обрести благоволи. Да друг от друга укрепляеми и вспомогаеми, в соузе любве и мира благоговейне поживем, и Царства вечнаго Твоего достигнем, идеже со дерзновением рцем: се мы, и чада, ихже дал еси нам. Обаче не моя воля, но Твоя да будет. Ты бо веси времена и сроки и коемуждо потребное ко спасению подаеши, да славит всякая тварь Тебе, единаго Владыку Небесе и земли, Отца и Сына и Святаго Духа, ныне, и присно, и во веки веков. Аминь.