Владыко Вседержителю, Господи, Иисусе Христе, Творче мiра, любви и милосердия Учителю!
Приими молитву сию, за народы земли Русския и Украинския ныне Тебе приносимую! Прости грехи и беззакония, ненависть и нетерпение всех нас. Не даждь мыслящим жестокая и коварная исполнити злыя советы их. Защити беззащитныя, исцели ранами уязвленныя, упокой убиенныя. Благодатию Пресвятаго Духа ороси любовию иссохшия сердца наша, тернием ненависти, коварства, властолюбия, корысти, зависти, злобы, лукавства и иными беззакониями поросшие, да возрастят людие Твои горящую к Тебе и братиям своим любовь, яко в ню устремляется всякое сердце человеческо, и ею да будут истреблены вся распри, раздоры и разделения. Усердно молим Тя, Господи: мир России и Украине даруй, Церкви Твоей и всем людям Твоим.
Яко Ты еси Царь мiра и Спас душ наших, и Тебе славу и благодарение и поклонение воссылаем, ныне, и присно, и во веки веков! Аминь.
Всевышний Боже, Владыко и Содетелю всея твари, наполняяй вся величеством Твоим и содержаяй силою Твоею!
К Тебе Великодаровитому Господу нашему припадаем, сердцем сокрушенным и усердною молитвою о стране Украинстей, распрями и нестроениями раздираемей.
Премилосердый и Всесильный, не до конца гневайся, Господи! Буди милостив нам, молит Тя Твоя Церковь, представляющи Тебе начальника и совершителя спасения нашего Иисуса Христа. Укрепи силою Твоею верныя люди в стране Украинстей, заблуждающим же просвети разумныя очи светом Твоим божественным, да уразумеют Твою истину, умягчи их ожесточение, утоли вражды и нестроения на страну и мирныя люди ея воздвизаемая, да все познают Тебе, Господа и Спасителя нашего. Не отврати лица Твоего от нас, Господи, воздаждь нам радость спасения Твоего. Помяни милости, яже показал еси отцем нашим, преложи гнев Твой на милосердие и даждь помощь Твою народу украинскому, в скорби сущему.
Молит Тя Церковь Русская, представляющи Тебе ходатайство всех святых в ней просиявших, изряднее же Пресвятыя Богородицы и Приснодевы Марии, от лет древних покрывающия и заступающия страны наша. Возгрей сердца наша теплотою благодати Твоея, утверди волю нашу в воли Твоей, да якоже древле, тако и ныне прославится всесвятое имя Твое, Отца и Сына и Святаго Духа, во веки веков. Аминь.
